जर्मनी—रुस संसारकै शीर्ष ५ ठूला बियर उत्पादकहरू देशहरुको सूचीमा उक्लिएको छ । मंगलबार प्रकाशित एक उधोग रिपोर्टअनुसार रुस शीर्ष ५ ठूलो वियर उत्पादक राष्ट्रमा उक्लिएपछि जर्मनी भने बाहिरिएको छ ।  

मंगलबार प्रकाशित रिपोर्टअनुसार, गत वर्ष जर्मनीमा अलि कम मात्रामा बियर उत्पादन भएको भएपनि रसियामा उत्पादन उल्लेखनीय रूपमा बढेको थियो। यो रिपोर्ट संसारकै ठूलो हप ट्रेडर ब्रेथहासले जारी गरेको हो ।

सन् २०१३ देखि युरोपकै शीर्ष बियर उत्पादकको उपाधि बोकेको जर्मनीले अब त्यो स्थान पनि गुमाएको छ। चीन अझै पनि संसारको सबैभन्दा ठूलो बियर उत्पादक राष्ट्रको रूपमा अग्रस्थानमा रहेको छ, त्यसपछि अमेरिका दोस्रो स्थानमा छ।

रिपोर्ट लेखक हाइनरिच मायरकाअनुसार रसियामा बियर उत्पादन करिब ९ प्रतिशतलेले बढेर ९.१ अर्ब लिटर पुगेको छ भने जर्मनीमा यो १ प्रतिशतले घटेर ८.४ अर्ब लिटरमा झरेको छ।

ब्रेथहासका प्रबन्ध निर्देशक थोमस राइजरका अनुसार, रसियामा बियरको उत्पादन वृद्धि हुनुको मुख्य कारण त्यहाँ आयात घटेर घरेलु उत्पादनमा जोड दिइनु हो।

चीन शीर्ष स्थानमा

रसिया र जर्मनी दुबै अझै पनि संसारका प्रमुख बियर उत्पादक राष्ट्रहरूभन्दा निकै पछाडि छन्। रिपोर्टअनुसार चीनले ३४ अर्ब लिटर र अमेरिकाले १८ अर्ब लिटरभन्दा बढी बियर उत्पादन गरेका छन् — यद्यपि दुबै देशमा करिब ५ प्रतिशतको गिरावट देखिएको छ।

ब्राजिल र मेक्सिकोले पनि सन् २०२४ मा रसिया र जर्मनीभन्दा धेरै बियर उत्पादन गरेका थिए, जसमा ब्राजिलले १४.७ अर्ब र मेक्सिकोले १४.५ अर्ब लिटर उत्पादन गरेका थिए।

जर्मनीमा बियर खपत लामो समयदेखि घट्दो क्रममा छ, जसका कारणमा वृद्ध जनसंख्या, अन्य पेय पदार्थहरूसँगको प्रतिस्पर्धा र आर्थिक कठिनाइका कारण घट्दो खरिद शक्ति रहेका छन्।

तर, रिपोर्टमा जर्मन बियर उद्योगका लागि केही सकारात्मक पक्ष पनि देखिएको छ — जर्मनी अझै पनि संसारकै सबैभन्दा ठूलो हप आपूर्तिकर्ता राष्ट्र बनेको छ, जुन बियर बनाउने मुख्य सामग्रीमध्ये एक हो ।

जर्मनीमा हप खेती गर्ने किसानहरूको संख्या केही समयदेखि घट्दै गएको छ र यस वर्ष त्यो संख्या १,००० भन्दा तल झरेर ‘ऐतिहासिक न्यून’ स्तरमा पुगेको छ।
 

जर्मन न्यूज सर्विसबाट भावानुवाद