काठमाडौं—नेपालमा एक वर्षमा १७ खर्ब २३ अर्ब २७ करोड रुपैयाँ रेमिट्यान्स भित्रिएको छ । आइतबार नेपाल राष्ट्र बैंकले सार्वजनिक गरेको गत आर्थिक वर्षको आर्थिक तथा वित्तीय प्रतिवेदन अनुसार आर्थिक २०८१/८२ मा १७ खर्ब २३ अर्ब २७ करोड रुपैयाँ रेमिट्यान्स भित्रिएको हो । 

आर्थिक वर्ष २०८०/८१ को तुलनामा यो १९.२ प्रतिशतले बढी हो । आर्थिक वर्ष २०८०/८१ मा  १४ खर्ब ४५ अर्ब ३२ करोड रुपैयाँ रेमिट्यान्स भित्रिएको थियो । 

गत आर्थिक वर्षको साउन महिनामा १ खर्ब ३६ अर्ब, भदौं महिनामा १ खर्ब २६ अर्ब, असोजमा महिनामा १ खर्ब ४४ अर्ब र कात्तिक महिनामा १ खर्ब १४ अर्ब रेमिट्यान्स भित्रिएको थियो । यसैगरी, मंसिर महिनामा १ खर्ब १८ अर्ब, पुस महिनामा १ खर्ब २२ अर्ब, माघ महिनामा १ खर्ब ३७ अर्ब र फागुन महिनामा १ खर्ब ५१ अर्ब रेमिट्यान्स नेपालका आएको थियो । 

चैतमा १ अर्ब २९ अर्ब रेमिट्यान्स भित्रिएकोमा त्यसपछि लगातार उकालो लागेको देखिन्छ । बैशाख महिनामा १ खर्ब ६५ अर्ब, जेठ महिनामा १ खर्ब ७६ अर्ब र असार महिनामा १ खर्ब ८९ अर्ब रेमिट्यान्स भित्रिएको छ । 

अमेरिकी डलरमा भएको वृद्धि र वैदेशिक रोजगारीमा जाने नेपालीको संख्याले रेमिट्यान्स बढेको बताइएको छ । 
गत वर्षमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिनेको संख्या ५ लाख ५ हजार ९५७ रहेको थियो । 

यसैगरी, पुनः श्रम स्वीकृति लिनेको संख्या ३ लाख ३३ हजार ३०९ थियो ।