काठमाडौं—प्रधानमन्त्री केपी शर्मा ओलीले नेपालकै पहिलो फ्लाइङ (उड्ने) कारको उद्घाटन गरेका छन् । मंगलबार नाडा अटो शो अवसरमा प्रधानमन्त्री ओली र एमडब्लु वृद्धिका अध्यक्ष विष्णुुमार अग्रवाल र प्रबन्ध निर्देशक विवेक सिकरियाले संयुक्त रुपमा फ्लाइङ कार डिपल इभीटोल (eVTOL)को उद्घाटन गरेका हुन् । 

नेपालकै सबैभन्दा ठूलो अटोमोबाइल मेला नाडा अटो शो मा उनले उक्त कारको उद्घाटन गरेका हुन् ।  नाडामा हरेक वर्ष नयाँ—नयाँ इनोभेटिभ आइडिया, प्रविधि र उत्पादनहरू सार्वजनिक गरिन्छ । एमएडब्लु वृद्धि ग्रुपले नाडामा फ्लाइङ कार डिपल ल्याएको हो । 

फ्लाइङ कारका नामले लोकप्रिय डीपल eVTOL अनावरण गर्दै  अध्यक्ष अग्रवालले भने, ‘नेपालमा भविष्यको यातायात ल्याउने दिशामा यो ठूलो उपलब्धि हो ।’ त्यस्तै प्रबन्ध निर्देशक सिकरियाले थपे, ‘नेपालको यातायात प्रणालीलाई नयाँ परिभाषा दिन सक्ने यस प्रविधि ल्याउन पाउँदा हामीलाई गर्व लागेको छ।’

डीपल इभीटोल साधारण ‘नयाँ गाडी’ मात्र होइन। फ्लाइङ कार बनाउनका लागि डीपल निर्माण गर्ने कम्पनी चांगान अटोमोबाइल र इह्याङले सहकार्य गरेर व्यक्तिगत यातायातको लागि नयाँ र आधुनिक उपाय ल्याएका हुन्।

डीपल चांगान अटोमोबाइलको नयाँ इनर्जी सब(ब्रान्ड हो, जुन चीनका सबैभन्दा ठूला अटोमोबाइल निर्माता कम्पनीमध्ये एक हो । त्यस्तै इह्याङ भने विश्वकै अगुवा अटोनोमस हवाई सवारी निर्माता हो जुन कम्पनीले पहिलोपटक व्यवसायिक रूपमा नै पाइलटविहिन यात्रु बोक्ने इभीटोल उपलब्ध गराएको थियो। यी दुवै कम्पनीको साझा उद्देश्य भनेको इह्याङको अटोनोमस उडान प्रविधिमा आधारित नयाँ पुस्ताका इभीटोल विकास गर्ने, उत्पादन गर्ने र बजारमा ल्याउने हो।

दुवै कम्पनीको लक्ष्य हवाई यातायातलाई केवल विलासिता मात्र नबनाई फ्लाइङ कारलाई सुरक्षित, वातावरणमैत्री र सजिलो बनाउँदै सर्वसाधारणको लागि पनि प्रयोगयोग्य बनाउने र यसलाई सबैका लागि पहुँचयोग्य गराउने हो। नाडा अटो शो २०२५ मा देखाइएको डीपल इभीटोल उनीहरूको यही सहकार्यको प्रत्यक्ष परिणाम हो।

त्यसबाहेक चांगानले सन् २०३० सम्ममा अन्य आधुनिक यातायात सोलुसन्स विकास गर्न २.७६ अर्ब अमेरिकी डलरभन्दा बढी लगानी गर्ने योजना बनाएको छ।

डीपल इभीटोल सीधै माथि उड्न र भुइँमै फर्केर अवतरण गर्न सक्षम छ, जसले भविष्यको दिगो यातायातको नयाँ विकासलाई देखाउँछ। डीपलमा हवाई इन्जिनियरिङ र अत्याधुनिक इलेक्ट्रिक प्रपल्सन प्रविधिको संयोजन छ जसले सडकमा हुने भीड कम गर्न, ध्वनि प्रदूषण घटाउन र कार्बन उत्सर्जन नियन्त्रण गर्न सहयोग गर्छ। 

उन्नत इन्जिनियरिंग प्रविधिबाहेक यसको ‘कुल’ डिजाइन आकर्षक र स्मार्ट प्रविधिले भरिपूर्ण छ। यो नयाँ प्रविधिहरूको आधुनिक रूप हो जसले देखाउँछ कि यातायात अब परम्परागत तरिकाले सडकमा मात्र सीमित छैन, सुरक्षा, दक्षता र पृथ्वीको स्वास्थ्यलाई प्राथमिकता दिँदै यो आकाशसम्म पनि फैलिँदैछ।