काठमाडौं—नाडा अटो शो २०२५ भदौं ३ बाट सुरु हुने भएको छ । नाडा अटोमोवाइल्स एशोसिएशन अफ नेपालको आयोजनामा काठमाडौंको भृकुटीमण्डपमा ३ देखि ८ भदौंसम्म नाडा अटो शो हुनेछ ।
उक्त अटो शोमा उड्ने कार पनि देख्न पाइने छ । यसैगरी, आयोजकले रोबोट पनि प्रदर्शनमा राखिने जानकारी दिएका छन् । चिनियाँ कम्पनी हाङझाउ युशु टेक्नोलोजी कम्पनी लिमिटेडले उत्पादन गरेको युनिट्री रोबोट नाडामा प्रदर्शनीका लागि राखिने छ।
युनिट्री ‘नाडा अटो शो २०२५’ को टाइटल स्पोस्सरसमेत हो। हाङझाउ युशु टेक्नोलोजी कम्पनी लिमिटेडले युनिट्री रोबोटको ट्रेडमार्क बनाएर यही नाममा रोबोट म्यान र रोबोट डग उत्पादन गरिरहेको छ। नाडा अटो शोमा रोबोट म्यान तथा रोबोट डग दुवै प्रदर्शनीमा राखिने भएको छ।
त्यसैगरी, नाडा अटो शोमा दिपलको उड्ने कार पनि देख्न पाइने भएको छ। एमएडब्लू समूहअन्तर्गतको एमएडब्लू वृद्धि अटो कर्प प्रालिले दिपलका अत्यधुनिक विशेषतायुक्त विद्युतीय कार बिक्री गर्दै आएको छ। कम्पनीले नाडा अटो शो २०२५ को आकर्षणका रुपमा रहने उड्ने कार शोकेसमा राख्न लागेको हो।
शोमा १९ वटा चारपांग्रे सवारी ब्रान्डहरू, १३ वटा हल्का व्यावसायिक सवारी, ४ वटा दुईपांग्रे सवारी ब्रान्डहरू, साथै ल्युब्रिकेन्ट, टायर, ब्याट्री, ग्यारेज उपकरण तथा वित्तीय सेवा प्रदायक गरी ३५ कम्पनीहरूको सहभागिता रहनेछ। यसबाहेक नाडा अटो शोमा १२५ भन्दा बढी प्रदर्शकहरू रहने र १ लाखभन्दा बढी आगन्तुक आउने अपेक्षा गरिएको छ।
३ लाख वर्गफुट क्षेत्रफल र १ लाख ६२ हजार ५ सय वर्गफुट प्रदर्शनी क्षेत्रसहित यो नेपालको अहिलेसम्मकै सबैभन्दा ठूलो अटो शो हुने नाडाले जनाएको छ।
तपाईको प्रतिक्रिया दिनुहोस